Ba banana?

Ganito kasi ang kwento. Baccalaureate mass ng minamahal kong ate na si Mox sa Ateneo Law sa Rockwell na katabi ng PowerPlant. So bilang celebratory mood kami after ng bonggang Misa (na may napakagandang homiliya galing kay Father Joaquin Bernas), naisipan naming kumain sa PowerPlant ng dessert.

Kaya ayun naglakad kami sa napaka-burgis na mall para kumain ng mga matatamis na bagay at uminom ng mamahaling tsaa sa Sugarhouse sa basement ng PowerPlant.

Grabe. Heaven yung mga kinain namin. Lalu na yung tsaa.

Ineenjoy ko pa ng dahan dahan yung tsaa ko nun eh, nang makita kong may mamang malaki na tumatakbo papuntang kanan. Yung una ko namang naisip, "naku, najejebs na si manong. Sana makaabot siya."

Nagulat na lang ako nang biglang may grupo naman ng mga babae na tumatakbo pakaliwa. "May scavenger hunt ba?" naisip ko. Tapos biglang may mas maraming tao na tumatakbo pakanan ulit! "May artista ba? Ano nangyayari? What the?"

Pero naku nung nakita ko nang tumatakbo pakanan yung mga security guard PUTSA NATAKOT NA AKO. Putek, lahat kami tumayo na ng mga upuan namin at pumasok sa loob ng SugarHouse. May bomb threat? May mamang may baril? May nakawan? Punyeta ayoko pang mamatay!!!

Takte, habang nakatayo kami at nagpapanic sa loob ng SugarHouse, naalaala ko yung tsaa kong naiwan ko sa table na dinadahan dahan ko pa. Twining's pa man din yun!

Nang marinig naming may sumisigaw ng "FIRE!" (oo fire, kasi like, it's PowerPlant noh, and people are like, burgis noh), wala na. TAKBO NA!

Yung unang instinct siyempre mula sa basement ay tumakbo sa first floor, kasi nandun yung mga pinto palabas. Pero takte, nung pagakyat na ng escalator, pagtingin mo sa taas, makikita mo na ang kapal na ng usok! Buti nga nahila pa namin nanay ko pababa ng escalator na paakyat kahit nakahigh heels siya.

Tapos by this time humahalimuyak na yung baho ng sunog. Grabe, ang baho niya. Kaamoy niya yung transistor na napasabog namin sa Applied Physics 181 lab. Only mas malala ng isang libong beses.

So after namin mamagic si mommy na bumaba ng escalator na paakyat habang nakaheels habang naiinhale ang napakabahong fumes, buti naalaala ni daddy na may exit papuntang parking sa pinakagilid ng mall. At least ang parking lot, hindi masusunog diba?

Pero kebs na muna ang kotse namin, kasi hello, pano ka makakapagdrive pag patay ka na diba? So takbo kami lahat sa labasan ng kotse. Para kaming mga daga na tumatakbo nakikisiksik sa gilid ng mga malalaking appliances na gumagalaw at bumubusina.

Wow lang talaga paglabas mo ng mall. Kung anung drama ang mararamdaman mo. Kasi ba naman, OHMIGOSH BUHAY PA AKO. Tapos dagdagan mo pa ng crowd na de-adrenaline pa na nagyayakapan, mga wangwang ng ambulansya at fire truck, at siyempre ng ulan napagka-drama drama sa napakabagal na pagpatak.

Pero siyempre, kailangan pa rin naming balikan ni daddy ang kotse. Hindi naman masusunog ang basement na parking lot. At ang usok, mako-contain sa loob ng mall. So lakad kami ulit kung saan kami dumaan. Grabe, makikita mo na pinagbabasag na ang mga de-salaming pintuhan para mas madaling makalabas ang mga tao. Tapos wow, yung mga pinto ng fire exit, sobrang nangangamoy pa rin ng baho ng sunog.

Sa parking area, less baho na. Nadilute na rin ang concentration ng usok (WOW AT NAGAWA KO PANG MAG-ISIP NG CHEM).

Ayun, nalabas na namin ang kotse, nasundo na sina mommy at ang mga kapatid at ang boyfriend ng ate, at nakauwi na.

---

Grabe lang talaga. Sa taong ito, pangalawang beses ko na nafeel na punyetamamamataynaakowagnamansanapleaselordhelp!

Yung una ay nung LoveRage, na napapalibutan kami ng nagwawalang mga jolog. Itong pangalawa ay sa PowerPlant na napapalibutan kami ng mga nagpapanic na sosi.

Natawa na lang ako sa aftermath kasi hindi magawa ng mga tao na sumigaw ng "SUNOG!" Kailangan talaga "FIRE!" sinisigaw ng mga tao. Tapos kung makatakbo, maliliit ang steps ng iba pagkat nakaheels pa (hi Mommy, hi Mox), or ganun lang talaga sila tumakbo.

Pero promise, yung pinaka-ayaw kong bagay na naexperience ngayong gabi ay yung amoy ng usok, at yung physical manifestation ng usok na nakikita mong nakapalibot na sa kung saan saan. Grabe, pag makita mo na yun matatakot ka na ng sobra.

Meh. Buti na lang at walang nasaktan sa amin. Woo, experience din to.

---

So ang nangyari ngayong gabi... Tumaas ang temperature. Tumaas ang kinetic energy. Nagreact ang mga tao ng pagkabilis-bilis.

POTEK CHEM. LUBAYAN MO NA AKO!